Fréttir eftir árum

Ari hóf leikinn og reytti af sér brandarana svo salurinn lá í hlátri. Síðan tóku Regína Ósk og Svenni Þór við með frábæra tónlistardagskrá. Alls komu 230 gestir sem skemmtu sér konunglega og lýstu yfir sérstakri ánægju með kvöldið.

Miðvikudaginn 29. mars klukkan 20:00 er komið að síðasta opna húsi vetrarins 2016-17 hjá Skólaskrifstofu Mosfellsbæjar haldið að venju í Listasal Mosfellsbæjar. Ævar Aðalsteinsson frístundafræðingur og verkefnistjóri stikaðra gönguleiða í Mosfellsbæ mun segja frá þeim útvistarmöguleikum sem bjóðast börnum og fjölskyldum þeirra í Mosfellsbæ.

Laugardagurinn 25. febrúar 2017 var skemmtilegur dagur í Bókasafninu. Við fengum tvo fallega hunda frá Vigdísi – Vinum gæludýra á Íslandi. Þeir komu ásamt eigendum og hlustuðu hundarnir andaktugir á unga Mosfellinga lesa. Því miður komust færri að en vildu. Myndirnar sem teknar voru segja meira en þúsund orð.

Því miður verður Fiskabúrið lokað í nokkra mánuði af óviðráðanlegum ástæðum. Á meðan verður boðið upp á aðstöðu í netkaffinu.

Freyja Sóley, níu ára stelpa í Varmárskóla, er vinningshafinn okkar í febrúargetrauninni. Spurningarnar voru af ýmsum toga eins og vanalega (spurt var um norræna goðafræði, Múmínálfana og hundinn hans Mikka músar) og Freyja svaraði þeim léttilega. Freyja kemur oft í safnið til okkar og les mikið, ekki síst bækurnar hans Ævars vísindamanns, en hann er uppáhaldsrithöfundurinn hennar.

Frá síðari hluta árs 2015 höfum við helgað einn sýningarskáp í Bókasafninu lítilli sýningu sem við köllum Mín kona. Í þessum skáp sýnir núna Þórhildur Pétursdóttir handavinnu og muni frá móður sinni Björgu Sóleyju Ríkarðsdóttur sem fædd var í Reykjavík 27. október 1918. Björg átti heima í Mosfellssveit með hléum í tæpa fjóra áratugi. Hannyrðir léku í höndum hennar og liggja meðal annars eftir hana margir dúkar. Björg Sóley lagði einnig stund á postulínsmálun í Danmörku og sjáum við einn hlut frá henni á sýningunni. Ath. þetta er fyrst og fremst frétt, en gæti einnig verið viðburður ef þér finnst það henta – þessum viðburði á að ljúka 31. Mars.

Finnsk bókmenntasaga samtvinnast sænskum bókmenntum. Frá miðri 13. öld fram til upphafs 19. aldar var Finnland undir stjórn Svía, og sænska var því tungumál yfirstéttarinnar allt að lokum 20. aldarinnar. Bókmenntir Finna eru ekki eingöngu á finnskri og sænskri tungu (finnsk-sænskar bókmenntir), heldur einnig á samísku.

Á síðasta Fræðslufundi Bókasafns Mosfellsbæjar skiptust gestir á fræjum til ræktunar, bæði blómafræjum og matjurtafræjum. Nokkrir pokar urðu eftir, aðallega blómafræ, og geta áhugasamir ræktendur komið í Bókasafnið og fengið fræ og leiðbeiningarblað - meðan birgðir endast.

Laugardaginn 18. febrúar opnaði Fókus – félag áhugaljósmyndara sýningu sína Ljós og skuggar í Fókus í Listasal Mosfellsbæjar. Á sýningunni er 21 mynd eftir jafn marga ljósmyndara. Félagarnir unnu með ljós og skugga eins og heiti sýningarinnar ber með sér. Gaman er að skoða útkomuna og stundum skiptir skugginn sköpum í myndinni. Fjölmenni var við opnunina.

Laugardaginn 25. febrúar 2017 frá kl. 13.00 -14.20. Í samstarfi við félagið Vigdísi - Vini gæludýra á Íslandi býður Bókasafnið börnum að koma í safnið og lesa sér til ánægju fyrir hunda, sem sérstaklega eru til þess þjálfaðir.