Fréttir eftir árum

Leikhópurinn Lotta í Bókasafninu kl. 10 og kl.11. Öll 5 ára börn velkomin.

Mikið var um dýrðir á opnun sýningar Jóníar Jónsdóttur og Sigurlínu Jóhannsdóttur í Listasal Mosfellsbæjar 3. ágúst sl. Sýningin fjallar um samband þeirra mæðgna og heitir Frá móður til dóttur – frá dóttur til móður. Sýningargestir supu á freyðivíni og sódavatni á meðan þeir skoðuðu verkin sem eru af ýmsum toga; textílverk, vatnslitamyndir og innsetningar.

Fyrsta þriðjudag í júní, júlí og ágúst í sumar var hittingur fyrir sumarlestrarkrakkana í Bókasafninu kl. 14.00. Við hittumst og spjölluðum; leystum þrautir og drógum út happdrættisvinninga.

Frá móður til dóttur – frá dóttur til móður er heiti sýningar Jóníar Jónsdóttur og Sigurlínu Jóhannsdóttur sem verður í Listasal Mosfellsbæjar 3. ágúst til 7. september 2018. Sýningin verður opnuð föstudaginn 3. ágúst kl. 16.00. Jóní Jónsdóttir er fædd árið 1972 og býr og starfar í Reykjavík. Hún nam myndlist við skúlptúrdeild Myndlista- og handíðaskóla Íslands og Konunglega Listaháskólann í Kaupmannahöfn. Hún hefur haldið fjölmargar listsýningar og unnið við leik- og danssýningar.

Laugardaginn 4. águst verður lokað í Bókasafninu og í Listasalnum. Opnum aftur þriðjudaginn 7. ágúst kl. 12.00.

Fyrsta þriðjudag í júní, júlí og ágúst í sumar er hittingur fyrir sumarlestrarkrakkana í Bókasafninu kl. 14.00. Við hittumst og spjöllum; leysum þrautir og drögum út happdrættisvinninga. Þriðjudaginn 3. júlí kom hópur krakka og tók þátt. Vinningshafar í happdrættinu voru: Lilja Sól, Sara Olivia og Emma. Allir fengu límmiða og súkkulaði. Næst hittumst við þriðjudaginn 7. ágúst kl. 14.00.

Tölt um tilveruna, einkasýning Guðrúnar Hreinsdóttur, var opnuð í Listasal Mosfellsbæjar síðastliðinn föstudag. Verkin á sýningunni eru öll máluð með vatnslitum og innblásin af náttúrunni. Þau sýna landslag og jurtir, fólk og dýr og ýmis önnur náttúrufyrirbrigði. Listakonan bauð upp á hvítvín og súkkulaði, gos og snakk og var það kærkomið fyrir sýningargesti sem voru sumir hverjir enn í sárum eftir tapleik íslenska landsliðsins í fótbolta. Við hvetjum fólk til að tölta yfir í Listasal Mosfellsbæjar og kíkja á verk Guðrúnar. Sýningin er opin á afgreiðslutíma Bókasafnsins og lýkur 27. júlí.

Nú er barnagetraun Bókasafnsins komin í sumarfrí. Síðasti vinningshafi vetrarins var Ásgerður Erla Elínborgardóttir, 11 ára. Hún fékk í verðlaun nýjustu bók Ævars vísindamanns, Ofurhetjuvíddina.

Föstudaginn 22. júní 2018 kl. 16-18 verður sýning Guðrúnar Hreinsdóttur, Tölt um tilveruna, opnuð í Listasal Mosfellsbæjar. Guðrún er myndlistarkona og læknir. Hún hefur lagt stund á leirlist og gefið út ljóð en seinni ár einbeitt sér að vatnslitaverkum. Guðrún hefur haldið nokkrar einkasýningar og tekið þátt í fjölmörgum samsýningum á Íslandi og erlendis. Hún sýndi m.a. verk fyrir hönd Íslands í NAS (Nordiska Akvarellsällskapet) á 18. sýningu ECWS (European Confederation of Watercolour Societies) á Spáni árið 2015

Bókasafn Mosfellsbæjar bauð fjórða árið í röð til ritlistarnámskeiðs fyrir 10-12 ára börn. Námskeiðið var haldið 11.-13. júní í safninu og leiðbeinandi var Davíð Stefánsson rithöfundur. Fjórtán krakkar tóku þátt að þessu sinni og var þeim uppálagt að taka sér ýmislegt skemmtilegt og spennandi fyrir hendur til að örva sköpunargáfuna. Að námskeiði loknu var foreldrum boðið til útskriftar þar sem börnin lásu úr verkum sínum og fengu afhent viðurkenningarskjöl.