Fréttir eftir árum

Steinunn Davíðsdóttir datt í lukkupottinn og er vinningshafi í barnagetraun Bókasafnsins þennan mánuðinn. Hún fær í verðlaun bókina Nærbuxnanjósnararnir eftir Arndísi Þórarinsdóttur. Steinunni finnst gaman að lesa og er tíður gestur hér í safninu. Hún er einnig mikil listakona; málar myndir, lærir leiklist og spilar á selló. Við óskum Steinunni innilega til hamingju og hlökkum til að sjá hana næst þegar hún mætir til okkar í safnið 😊

Nú er barnagetraunin farin í hundana. Kíkið til okkar og svarið fisléttum spurningum um hunda og heppnin gæti verið með ykkur. Einn heppinn þátttakandi fær bók í verðlaun. Getraunin er á sínum stað í barnadeildinni og starfsfólk safnsins alltaf tilbúið til að aðstoða.

Þriðjudaginn 14. janúar kom Sirrý Arnardóttir í Bókasafnið og kynnti bók sína ,,Þegar kona brotnar“. Sirrý er skemmtilegur fyrirlesari og miðlaði efninu á sinn einstaka hátt. Bókin hefur notið mikilla vinsælda og margar konur keyptu eintak á staðnum og fengu áritað af höfundi. Þó nokkur fjöldi mætti í safnið þrátt fyrir vont veður og vonda veðurspá.

Um 150 manns mættu á opnun sýningar Hjördísar Henrysdóttur föstudaginn 10. janúar þrátt fyrir aftakaveður. Veðrið rímaði reyndar ágætlega við verkin en flest málverk Hjördísar eru af bátum sem berjast í ólgusjó. Hjördís hefur persónulega tengingu við efnið því hún er dóttir Henrys Hálfdánarsonar sem lengi var formaður Slysavarnafélags Íslands og stjórnaði mörgum björgunaraðgerðum á sjó. Verkin á sýningunni eru til sölu og seldist meirihluti þeirra á opnuninni. Síðasti sýningardagur er 7. febrúar en þann dag verður Hjördís með leiðsögn sem auglýst verður síðar.

Litli skiptibókamarkaðurinn fyrir börn var haldinn í Bókasafni Mosfellsbæjar laugardaginn 11. janúar fimmta árið í röð og tókst með eindæmum vel. Frábær þátttaka og mikið fjör þar sem allir höfðu gaman af, bæði börn og foreldrar. 132 bækur skiptu um eigendur þennan dag. Krakkarnir fóru ánægðir heim með nýjan bókafeng og bókamerki Litla skiptibókamarkaðarins í farteskinu. Endurtökum leikinn að ári, sjáumst hress. Með kveðju, starfsfólk Bókasafnsins.

Fyrsti vinningshafi ársins í barnagetraun Bókasafnsins er Dagur Hrafn Helgason. Hann er 11 ára gamall og er nemandi í Lágafellsskóla. Dagur hefur áhuga á tölvuleikjum og íþróttum og þegar hann les finnst honum skemmtilegast að kíkja í Syrpuna. Hann er greinilega líka með íslensku jólasveinana á hreinu en hann svaraði spurningunni um Stúf kórrétt og var ekki lengi að finna Kertasníki í felum hjá jólabókunum. Í verðlaun fær Dagur nýju bókina um Orra óstöðvandi eftir Bjarna Fritzson. Við óskum Degi innilega til hamingju!

Á nýju ári verður tekið upp á þeirri nýbreytni í Bókasafni Mosfellsbæjar að opna dyrnar upp á gátt - án þjónustu - kl. 9.00 á morgnana, virka daga. Hefðbundinn afgreiðslutími með þjónustu er svo frá kl. 12-18 mánudaga og þriðjudaga, kl. 10-18 miðvikudaga, kl. 12-18 fimmtudaga og föstudaga og kl. 12-16 á laugardögum allt árið.

Barnagetraunin mætir úthvíld til leiks eftir jólafríið með þrjár nýjar spurningar um álfa. Komið við í barnadeildinni og takið þátt! Í byrjun febrúar verður dregið úr réttum svörum og einn heppinn þátttakandi fær bók í verðlaun. Ekki hika við að spyrja starfsfólk Bókasafnsins ef ykkur vantar aðstoð.

Starfsfólk Bókasafns Mosfellsbæjar óskar ykkur gleðilegs árs og þakkar samfylgdina á því liðna.